اشعار ترکی امام حسین (ع)

حسین بهشتون آقاسی
حسیندی کعبه صفاسی
باشیمدا وار گئجه گوندوز
هوای کرب و بلاسی

بو قلبی داغلارام الله
حسینه آغلارام الله

حسین حقیقت قرآن
حسین طراوت رضوان
حسین عدالته برهان
حسینه جان اولا قربان

اسیر کوی ولایم
گداي کرب وبلایم

گوزیمده اشک تریم وار
نه آشیان نه پریم وار
اورکده چوخ کدریم وار
حسین ئولوب خبریم وار

بو دردی سای دیرم من
حسینه وای دیرم من

اوجالدی شیون وشینیم
واریمدی عشقمه دینیم
بو درد وغصه نی نیلوم
کفن سیز ئولدی حسینیم

اورکده داغنه قربان
یانان دوداقنه قربان

غریبه صحنه گوروندی
اورک غمیله هُرروندی
فلک ملاله بوروندی
حسین یارالی سوروندی

دوشوبدی عالمه غوغا
گلوبدی مقتله زهرا

تاپاندا یاره لی ماهی
گورنده قانلی شفاهی
دیلینده شعله آهی
دیردی یاندیم الهی

سوزور قانی یاراسیندان
ئوپوم مگر هاراسیندان

• دوشنبه
• ۱۲
• آبان
• ۱۳۹۹
• ساعت
• ۱۰:۴۰
• نوشته شده توسط
• یوسف اکبری

غمونده یا حسین سنین تمام گُویلر آغلادی
گلوب فغان و شُورشه هامی مَلک لر آغلادی

کسنده باشیوی سنون او شمرِ شومِ و بی حیا
بوغازیوی کسن زمان اَلینده خنجر آغلادی

قویاندا یوز قوشون سنون او خیمگاه یوه طرف
نچه قدم سورون موسن باخاندا لشکر آغلادی

قلج لار اَلده یوز قویوب گلوبله لشکر اوستیوه
آلوبلا دوره وی سنون بو ظلمه یِرلر آغلادی

دوشوبدی حیرته باخوب بو سوزده جمله اَنبیا
دیوبله جان حسین سنه هامی پیمبر آغلادی

او حالدا بیر نفر سنون یتشمیوب دی دادیوه
بو حاله باخدی سس چکوب تمامِ صَفلر آغلادی

او قدری ظلم ایدوب دولر قیامت اولدی آشکار
او ظلم لر عَیان اولوب او عَرشِ داور آغلادی

نه زَحمتی له باشیوی بدندن آیری سالدیلار
او حالته باخوب او گُون یارالی پیکر آغلادی

گلوبله قتلگاهی وه گُوروبله پیکرون سنون
دیوبله وا مُحمّدا هامی حَرم لر آغلادی

ووروبلا اُود خیامیوه آلیشدی یاندی سر بسر
او دَم زمینِ کربلا باخوب سراسر آغلادی

قاچوبلا چوللّره هامی او گُونده آلِ مُصطفی
او وَضعِ حاله باطناً باخاندا چوللّر آغلادی

اوشاق بویوک قاچاردی لار نه وَضعِ حالی له هامی
او حالِ غارته گلن باخاندا یکسر آغلادی

یتنده سنگ دل قُوشون اوشاقلاری ووروب دولار
اَلین دَه تازیانه لر باخوب یتیم لر آغلادی

اِیاقلاری نا آتلارین وورولدی تازه نعلی لر
چتین اولوبدی زینبه باخوب مُکدّر آغلادی

یارالی نعشی لر گوروب او حالی باطناً یانوب
او قطعه قطعه دوغرانان هامی بدن لر آغلادی

اَبوالفضلین تَلاطمه گلوب یارالی پیکری
فراتین اُوسته سس چکوب او ماه مَنظر آغلادی

بو نوحه نی یازان زمان چوخ آغلیوبدی (واعظی)
غمونده یا حسین سنون تمامِ گُویلر آغلادی

• چهارشنبه
• ۳۱
• شهریور
• ۱۴۰۰
• ساعت
• ۱۶:۵۱
• نوشته شده توسط
• یوسف اکبری